身心成長情緒課 後記：關於勇敢、關於真實、關於愛的功課

課後我整理相片，放大每張相，望到每位小朋友嘅眼神變化，係由一開始有啲怕陌生/拘謹，到後來喺瑜伽墊上面搵到自己嘅呼吸節奏，再到攞住支畫筆嗰陣，完全投入、無保留咁畫，再嘴巴唔停咁分享……每一個呢啲瞬間，都會令我覺得好感動🥹（然後落堂就唔捨得講byebye🤣我指老師自己本人，我諗小朋友都係🤭😆)

我成日諗：喺呢個乜都講求快、講求即刻有結果嘅世界，我哋最想畀小朋友嘅，究竟係乜？塞更多知識落佢哋腦袋？逼佢哋提早學會好多技能？定係一份可以真正安頓自己內心嘅能力？

我哋好多時都習慣叫小朋友「要乖啲😠」、「唔好喊😉」、「開心啲啦😀」，但好少停一停，同佢哋一齊去感受「唔開心」到底係點樣嘅感覺。其實情緒本身冇所謂對錯！！只係身體同我哋溝通緊，如果我哋選擇唔理佢哋，呢啲聲音唔會消失，只會越嚟越大力咁返嚟搵我哋..

呢個就係我一直堅持教嘅原因，感恩有小夥伴 @hoikiii 有共同理念🥰一齊並肩合作💪🏻

特別想提到，點解要整「情緒面譜」？好多小朋友其實唔係唔識感受情緒，而係佢哋未搵到啱嘅語言去講出嚟。當佢哋對住鏡，望住自己生氣嗰陣眉頭點皺、開心嗰陣眼尾點彎、驚嗰陣嘴巴會點震，然後再用顏色一筆一筆畫落嚟……我見到嘅，係佢哋開始為自己嘅感受搵到一個具體嘅樣貌。慢慢地，就算佢哋講唔出「焦慮」呢個詞，佢哋都開始知道呢種感覺係點、有咩表情。有咗呢啲具體嘅認識，佢哋就會開始認得出、接納到，之後慢慢學識同自己嘅情緒和平相處。

能夠見證呢啲好細好細、但又好重要嘅轉變，我覺得自己好幸運。望住佢哋親手為自己嘅情緒搵到出口，然後帶住「我得嘅」嘅信心行出去。呢份內在嘅韌力，先係真正可以陪佢哋面對未來所有唔確定嘅力量。

好感恩我能夠將心入面嘅信念一步一步實踐出來。我好相信，每個小朋友心底都有好強大嘅自癒能力，我哋要做嘅，只係畀佢哋啲工具，然後真心相信佢哋。

好多謝每一位願意將小朋友交畀我哋嘅家長，讓我哋一齊見證住成長嘅小奇蹟，同時喺小朋友身上，都學到好多關於勇敢、關於真實、關於愛嘅功課。

（溫柔抱抱）多謝你哋一直嘅信任同支持～♡